Ekonomija - Crna Gora

Javnim nabavkama najbolja ocjena u Izvještaju o poslovnom ambijentu

Sistem javnih nabavki je u Izvještaju o poslovnom ambijentu ocijenjen sa prosječnom ocjenom 2,77, i rastom od 0,22 poena u odnosu na prošlogodišnju ocjenu.

Od ukupnog broja anketiranih privrednih subjekata na tenderima za javne nabavke učestvovalo je 40,3%, koji su i ocjenjivali ovu oblast. Prosječna ocjena poslovnog ambijenta sa aspekta javnih nabavki (2,77) je blizu zadovoljavajućeg nivoa (ocjena 3).

"Privrednici su najvišu ocjenu dali elektronskom sistemu javnih nabavki (3,29), zatim poštovanju roka za izmirenje obaveza od strane države (3,27), transparentnosti javnih nabavki (2,76), zakonodavnom okviru (2,62) kao i radu nadležnih organa za kontrolu javnih nabavki (2,58)", navodi se u saopštenju Ministarstva finansija.

Rast povjerenja koje privredni subjekti imaju u sistem javnih nabavki i bolje pozicioniranje u okviru poslovnog ambijenta rezultat su, kako navode, intenzivnog reformskog procesa koji je Ministarstvo finansija sprovelo poslednjih godina.

Unaprijeđeni su svi segmenti sistema javnih nabavki - od regulatornog okvira, elektronskog sistema javnih nabavki, kao i primjene međunarodnih standarda i profesionalizacije u okviru politike javnih nabavki.

"Ministarstvo finansija je posvećeno izgradnji partnerskih odnosa sa privrednim sektorom i ulaganju zajedničkih napora ka stabilnijem, transparentnijem i efikasnijem sistemu javnih nabavki Crne Gore", poručuju iz resora Novice Vukovića.