Ekonomija - Makedonija

Приватизацијата на градежното државно земјиште поскапува за 30 пати

Со измените, за 30 пати се зголемува цената на неизграденото земјиште наменето за колективно домување и комерцијален деловен објект, за стопански производни објекти таа се зголемува 20 пати. Надоместот за приватизација на државното градежно земјиште, кое е за индивидуално домување или колективно домување што е изградено, останува непроменет од 61 денар за квадратен метар, информира Министерството за финансии.

Уредбата, како што објаснуваат, се однесува на надоместокот за приватизација на градежно земјиште во државна сопственост, што се спроведува од страна на Управата за имотно-правни работи. Станува збор за приватизација на државно земјиште, само во услови каде што е стекнато корисничко право.

Според Министерството, предложената измена се врши поради зголемената пазарна вредност на градежното земјиште во однос на вредноста на градежното земјиште во 2005 година кога стапи во сила Законот за приватизација и закуп на градежното земјиште во државна сопственост, а пред сѐ, да им се оневозможи на правни и физички лица, кои по основ на приватизација по досегашниот надомест за приватизација, ги реализираа градбите за намени предвидени со актите за планирање на просторот (колективно домување, комерцијални, деловни, стопански, производни објекти и објекти наменети за спорт и рекреација) и на овој начин стекнуваа имотна корист.

Додаваат дека висината на надоместот ќе зависи од тоа во кој од петте региони се наоѓа земјиштето и дали е во централно и надвор од централно подрачје.

Појаснуваат дека во скопските општини за неизградено земјиште за колективно домување и комерцијален деловен објект висината на надоместот ќе изнесува 13.140 денари за квадратен метар, за стопански производни објекти 8.760 денари и објекти за спорт и рекреација 4.380 денари.