Ekonomija - Makedonija

За амортизирање на ценовните шокови 615 милиони евра

Минатата година преземени се мерки за амортизирање на порастот на цените, а годинава дополнително е донесен сет од 26 мерки за поддршка на стандардот на граѓаните и фирмите, но и за финансиска поддршка на фирмите преку Развојната банка, соопшти владината прес-служба.

„Благодарение на овие мерки имаме најниска цена на нафта и нафтени деривати во регионот. Ефектите од владините одлуки дадоа резултати. Преку замрзнување на цените на прехранбените производи, а потоа и намалување на данокот на додадена вредност од пет на нула проценти, успеавме да спречиме огромен раст на цените. Дополнително, на основните прехранбени производи се ограничени и малопродажните и големопродажните маржи за заштита на стандардот на граѓаните. Без овие мерки, сметките за храна би биле повисоки за 1.500 денари месечно. Дополнително, за ранливите категории граѓани обезбедивме финансиска поддршка од 1.000 денари месечно за да може да ги покријат своите сметки и ја покачивме минималната плата на 18.000 денари.

Во изминатиот период Владата сите ресурси ги насочи кон справување со кризата. Со мерките за одржување на ликвидноста на компаниите и ликвидноста на енергетскиот сектор, како држава одлучивме 80 проценти од сметките за електрична енергија да ги субвенционираме. Без овие мерки, цената на електрична енергија, односно сметките за струја на граѓаните би биле за 2.150 денари повисоки. Доколку не беа ограничувањата на маржите и намалувањето на ДДВ, а нафтените деривати би ги плаќале само по основ на ДДВ, без намалувањето на акцизата, 300 денари повеќе.

Порасна и просечната плата, а во повеќето од секторите во државата во изминатите години платите беа покачени и над 20 проценти во изминатите три години. Владата е на чекор од реализација на ветувањето од минимум 30.000 денари просечна плата, последните податоци покажуваат дека просечната плата изнесува 29.980 денари“, додаваат од Владата.

Од таму велат дека влогот во стандардот на граѓаните е врвен приоритет, особено во услови на огромна економска криза и Владата ќе продолжи финансиски да ги поддржува и граѓаните и компаниите.