Energetika - Makedonija

Стапуваат во сила мерките за штедење струја

Министерството за економија донесе сет препораки и задолженија за намалување на потрошувачката на електрична енергија во пресрет на зимата, која се очекува да биде тешка.

За домаќинствата и за компаниите предвидени се само препораки, а за институциите предвидени се конкретни задолженија. Целта е да се постигне 15 отсто помала потрошувачка во однос на истиот месец од претходната година. Ако не се постигне оваа цел, ќе следуваат санкции за институциите.

Државните објекти што се во сопственост на централната власт задолжени се да го исклучат декоративното осветление на фасадите. Не смее да се користи светло внатре во објектите во период кога има доволно дневна светлина. Во јавните објекти во сезона на ладење температурата да се мести не пониско од 27 степени, односно во сезоната на греење не повисоко од 20 степени.

Кратко и интензивно проветрување, исклучување на осветлението, да се исклучат сите компјутери по завршување на работата. Да се печатат само неопходни документи, редовно да се менуваат филтрите на грејните тела, се препорачува ставање ПВЦ-прозорци каде што е можно. Ќе треба институциите да имаат ангажирано лица што ќе се грижат дали ова ќе се спроведува. Раководителите секој месец ќе достасуваат извештаи до Владата за потрошувачката на енергија.

Овие задолженија ќе важат до 31 март 2023 година.

Во делот на јавните патишта треба да се намали осветлението до минимален сигурносен обем на осветлување улици, плоштади и други објекти.

На домаќинставата им се препорачува вклучување бојлер по потреба и по можност на евтина струја, вклучување на машините за перење и за миење садови само кога се полни и исто така на евтина струја, разумно користење на грејните тела, максимално користење на дневната светлина и топлината од сонцето, гасење на светилките кога не се престојува во одередни простории, готвење во помали садови или во садови соодветни на големината на ринглата, кратко и интензивно проветрување на просториите.